Ой тогтоолтын ОУ-ын Их Мастер, Гиннесийн рекорд эзэмшигч, дэлхийн аварга ихэр тамирчид болох Н.Мөнхшүр, Н.Энхшүр нар Хятадын хамгийн их үзэгчтэй Jiangsu телевизийн "The Brain" шоу нэвтрүүлэгт оролцохоор болсон билээ. Тэд шоуны урилгыг хүлээн авч тус улсын шилдэг хоёр тамирчинтай халз өрсөлдөхөөр болсон юм. "The Brain" буюу "Super Brain" шоу нь Хятадын мастерууд улс улсын шилдгүүдтэй хүний санаанд ормооргүй тархины гайхамшгийг харуулсан даалгавруудыг гүйцэтгэж өрсөлддөг онцлогтой.  Ташрамд дурьдахад 2016 онд тус шоунд Монголын Оюун Ухааны Академийн тамирчин, ой тогтоолтын ОУ-ын Их Мастер Э.Энхмөнх оролцож ялалт байгуулж байсан билээ. Мөн тухайн нэвтрүүлэг цацагдсан орой 300 сая гаруй хүн үзсэн гэсэн статистик тоо гарч байв. Тэгвэл Өнөөдөр орой 21 цагаас ихэр аваргуудын оролцсон Хятадын хамгийн олон үзэгчтэй телевизийн шоу нэвтрүүлэг болох “Super Brain” Jiangsu tv-ээр гарах юм байна. Тэд БНХАУ-н мастеруудтай өрсөлдөнө.