Шаардлага тавьсан цагдаагийн алба хаагчийн биед халдсан хэрэг гарчээ. Тодруулбал, энэ сарын 24-ний өдрийн 23:00 цагийн үед Баянгол дүүргийн 4 дүгээр хорооны нутаг дэвсгэрт "Согтуу жолооч автомашинаа унаад хөдлөх гэж байна" гэсэн мэдээлэл иржээ.

Дуудлагаар БГД-ийн цагдаагийн газрын Замын цагдаагийн хэлтсийн алба хаагчид очиж шалгахад иргэн Д нь автомашинаа согтуугаар жолоодсон зөрчил илэрчээ.

Улмаар цагдаагийн хэлтэс дээр очиж шалгуулах шаардлага тавихад хэл амаар доромжилж, эсэргүүцэл үзүүлэн цагдаагийн алба хаагчид халдсан байна. Согтуугаар тээврийн хэрэгсэл жолоодсон болон цагдаагийн алба хаагчийн хууль ёсны шаардлагыг эсэргүүцсэн үйлдлүүдэд Баянгол дүүргийн цагдаагийн газрын Замын цагдаагийн болон хоёрдугаар хэлтэст зөрчлийн хэрэг бүртгэлтийн ажиллагаа явуулж байна.

Зөрчлийн тухай хуулийн 14.7 зүйлийн 3 дахь хэсэгт зааснаар Жолооч: 3.1 Согтууруулах ундаа, мансууруулах эм, сэтгэцэд нөлөөт бодис хэрэглэсэн үедээ тээврийн хэрэгсэл жолоодсон бол тээврийн хэрэгсэл жолоодох эрхийг нэг жилийн хугацаагаар хасаж, дөрвөн зуун нэгжтэй тэнцэх төгрөгөөр торгох шийтгэл оногдуулна,

Зөрчлийн тухай хуулийн 15.2 зүйлийн 2 дахь хэсэгт Хууль сахиулах чиг үүргийг хэрэгжүүлж байгаа 2.1 Төрийн албан хаагчаас тавьсан хууль ёсны шаардлагыг биелүүлээгүй, эсхүл биелүүлэхгүй байхыг уриалсан,

2.2 Төрийн албан хаагчийн үйл ажиллагаанд нь саад учруулсан,
2.3 Төрийн албан хаагчийг хүч хэрэглэхгүйгээр эсэргүүцсэн, эсхүл доромжилсон бол хүнийг хоёр зуун тавин нэгжтэй тэнцэх хэмжээний төгрөгөөр, хуулийн этгээдийг хоёр мянга таван зуун нэгжтэй тэнцэх хэмжээний төгрөгөөр торгоно гэж заасан байдаг.