Ажлын чадвар, чадамжгүй албан тушаалнуудад хариуцлага тооцож, ажлаас нь чөлөөлж эхэлсэн. Гэтэл нэг л нөхөр суудалдаа шигдсээр үлдлээ. Өнөөдөр монгол төгрөгийн ханш урьд хожид байгаагүйгээр унаж, цаас болсон мөн валютын нөөцгүй болж, ам.долларын ханш тэнгэрт хадаж, инфляц хөөрөгдөж байхад хуруугаа ч хөдөлгөхгүй суугаа эрхэм бол Монголбанкны Ерөнхийлөгч Б.Лхагвасүрэн юм. Түүнийг ажлаа хийж чадахгүй байна. Чадах хүнийг нь томилмоор байна гэх шаардлагыг гишүүд  олонтаа тавьсан ч Ерөнхий сайд цээжээрээ хамгаалаад байгаагийн учир юу вэ. Юунд барьцаалагдсан болоод тэр вэ. 
Ерөнхий сайд Л.Оюун-Эрдэнэ “Ажил хийж байгаа хүнийг Ерөнхий сайд хамгаалах үүрэгтэй. Монголбанк УИХ-ын харъяа байгууллага. Гэхдээ энэ цаг үе аль ч улсын Төв банкны захирлуудад хүнд байна. Төв банкинд хэдэн "үзэгдэл" шүгэлдээд байгааг би сонссон. Аятайхан байгаарай гэж хэлье, эрх баригч намын даргын хувиар. УИХ-ын гишүүдийн өрөөгөөр ороод Төв банкны дараагийн ерөнхийлөгч болно гэж яваа нөхөд дуулдаж байгаа шүү. Залуучууд аа, амбицаа татаж сураарай. Ийм нөхцөл байдал үүссэн байхад албан тушаалын дон шүгэлж далжигнаад хэрэггүй гэдгийг хатуухан хэлье.
Төв банкны ерөнхийлөгч огцрохгүй. Ажлаа хийнэ. Авлигатай холбоотой, ажлаа хийж чадахгүй байгаа төрийн албан тушаалтанд хариуцлага тооцно. Түүнээс биш хүнд цаг үеийг сөрөөд зогсож байгаа албан хаагчаа хэнээс ч айхгүйгээр хамгаална” гэж байв.