УИХ-ын гишүүн Б.Энхбаяр Хөгжлийн банкны гэрч дуудах сонсголын талаар мэдээлэл хийлээ. Тэрбээр “УИХ-ын 2022 оны дөрөвдүгээр сарын 15-ны өдрийн тогтоолоор Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар хянан шалгах үүрэг бүхий түр хороо байгуулсан. Энэхүү түр хороо Хөгжлийн банктай холбоотой сонсголыг энэ сарын 16-20-ны өдрүүдэд зохион байгуулж, Хөгжлийн банкнаас шууд санхүүжүүлсэн 3,5 их наяд төгрөг бүхий 77 зээлдэгчтэй холбоотой зээлийн олголт, эргэн төлөлтийн талаар сонсож, холбогдох гэрчүүд болон  хамаарал бүхий этгээдүүдээс асууж, нотлох баримтыг шинжилнэ” гэв. 
Сонсголд эхний байдлаар 700 гэрчийг дуудах тооцоолол гарсан ба түр хороонд харъяалагдахгүй гишүүд, иргэд, хэвлэл мэдээллийнхнийг ч оролцуулахгүй юм байна. Сонсголд гэрчээр дуудагдан оролцох хүмүүсээс тайлбар мэдүүлэг авах ба тэд үнэн зөвөөр мэдүүлэх үүрэг хүлээх юм.
Б.Энхбаяр гишүүний энэхүү сонсголд Монгол Улсын Ерөнхийлөгч асан Ц.Элбэгдорж, Х.Баттулга, Ерөнхий сайд асан Ч.Сайханбилэг, Ж.Эрдэнэбат, Ч.Хүрэлбаатар, С.Бямбацогт, Б.Чойжилсүрэн, Ц.Анандбазар, О.Цогтгэрэл, гишүүн асан С.Бямбацогт, З.Баянсэлэнгэ, А.Сүхбат, Ц.Гарамжав зэрэг төрийн өндөр албан тушаалтнуудын нэрс ч яваа юм.