KOVO буюу Солонгосын воллейболын холбооны драфтын үйл ажиллагааны сүүлийн өдөр өнөөдөр/2023.04.27/ тохиож, багууд сонголтоо хийлээ. Энэ жил Азиас Япон, Монгол, Тайвань, Хонк Конг, Тайланд, Филиппин, Индонези, Вьетнам, Малайз, Мьянмар зэрэг арван улсын тамирчид драфтад нэрээ өгөх боломжтой болсон бөгөөд манай улсаас Т.Хангал, Б. Батсуурь, Ж.Энх-Эрдэнэ, Б.Баярсайхан нар шалгаруулалтад оролцохоор Чэжүг зорьсон юм.

Тэгвэл гурван өдөр сонгон шалгаруулалт, бэлтгэлд хамрагдсаны эцэст өнөөдөр лигийн долоон баг тус тусын сонголтоо хийжээ. Драфтын эхний сонголтод "Samsung Fire Blue Fangs" баг Монголын тамирчин Ж.Энх-Эрдэнийг сонгосон бол дөрөв дэх сонголтоор "Аnsаn Okman" баг тамричин  Б.Баярсайхан нарыг тус тус сонголоо. Дээрх хоёр тамирчин хоёулаа солонгос хэлтэй байсан нь давуу тал болсон аж.

Мөн Япон, Филиппин, Тайланд, Тайванийн тамирчид ч сонгогдов.

Солонгосын лигт сонгогдож чадвал жилийн 100 мянган ам.долларын гэрээ үзэглэх боломжтой. Мөн дээрээс нь багийн амжилтаас шалтгаалан 5-10 мянган ам.долларын урамшуулал, баг ялах бүр 500 ам.доллар хүртэхээс гадна тамирчдын гэр бүлийн аялалын зардал даадаг гэнэ.