Гэрэгэ бондын төлбөрийг бүрэн төлж барагдуулсан талаар Сангийн сайд Б.Жавхлан мэдээлэл хийлээ. Тэрбээр "Монгол Улсын Засгийн газраас анх 2017 онд авч байсан Гэрэгэ бондын үлдэгдэл болох 387 сая ам.долларыг өнгөрсөн Баасан гарагт төлснөөр, уг бондын төлбөр бүрэн барагдаж дууслаа" гэв. 

Гэрэгэ бондын 800 сая ам.долларын тухайд:

• 2017 онд авсан 
  
• Хугацаа: 5.5 жил
• Хүү: 5.625%
• Зориулалт: Чингис бондын 500 сая ам.доллар, Дим сам нэг тэрбум юань, үнэт цаасны дахин санхүүжилт байв.

Үргэлжлүүлэн "Гадаад өрийн менежментээ амжилттай хийсний үр дүнд Гэрэгэ бондын үлдэгдлийг барагдуулж дууссанаар олон улсын санхүүгийн зах зээлд Монгол Улсын Засгийн газар хариуцлагатай байгаагаа харуулсан төлөлт боллоо. Засгийн газрын 8.6 тэрбум ам.долларын нийт өр найман тэрбум ам.доллар болж буурсан.

2023 оны нэгдүгээр сарын 19-нд гадаад зах зээлд шинэ бонд амжилттай гарсан. 650 сая ам.долларын захиалга гаргаад нийтдээ $4 тэрбумын захиалга авч чадсан. 8.65 хувийн хүүтэй гарсан" гэв. 

Мазаалай, Чингис, Гэрэгэ бондын өр төлбөрийг бүрэн барагдуулж дуусгаснаар Монгол Улсын Засгийн газар гадаад өрөөс хамааралтай дефолтоос бүрэн гарч буйг Сангийн сайд мэдээллийн төгсгөлд онцлов. 

Дараагийн төлбөрүүд 2025 оноос хойш үргэлжилнэ.