Иргэн О.Цэрэнтогтох Хүнс, хөдөө аж ахуй, хөнгөн үйлдвэрийн сайд Х.Болорчулуунтай холбоотой факт, баримтыг шалгуулахаар АТГ-т өчигдөр гомдол гаргасан.  Харин энэ талаар Х.Болорчулуун сайд тайлбар өглөө. Тэрбээр “Цэрэнтогтох гэдэг хүний би танихгүй. Тэр хүн иргэнийхээ хувьд хардах эрхтэй боловч гүтгэх эрхгүй юм. Надад хууль бус хийсэн зүйл байхгүй. 100 хувь баталж чадна. Энэ танихгүй хүний царайн цаана нэг бохир улстөрч байгаа. Тэр хүн намайг АТГ-т нөлөөлж, нүүрсний  хулгайд өөрийнх нь нэрийг оруулсан гэж хардаад байгаа юм. Эсвэл тамын тогооны үлгэрээр хамтдаа шатъя гэж байгаа. Хуулийн байгууллага нэг хүний үгээр явна гэж юу байх вэ гэлээ.
Хэвлэлийнхэн түүнээс бохир улстөрч гэж хэнийг хэлээд байгааг лавлахад Х.Болорчулуун сайд “Цол хэргэм, албан тушаалын төлөө хэнтэй ч  найзалж, юу ч хийхээс сийхгүй тэрбумтан бохир улстөрч бий. Өөрөө ямар байна бусдыг мөн тэгж боддог бололтой. Миний хувьд тариа, будаа, гурил шиг зам мөр маань цагаан гэж итгэлтэй хэлнэ” гэв.
Түүний хэлж буйгаар бол, АТГ Нүүрсний хулгайн хэрэгт долоон улстөрчийг нэрлэсэн. Тав нь МАН, хоёр нь АН-ынх. Эдгээрээс тэрбумтан нь “Ажнай” Б.Бат-Эрдэнэ, Ц.Анандбазар нар. Харин албан тушаал, эрх ямба, эд хөрөнгийн төлөө хэнтэй ч найзалж, нөхөрлөхөд бэлэн явдаг тэрбумтан, бохир улстөрчийг хардах эрхийнхээ хүрээнд нэрлэвэл, Ц.Анандбазар л юм биш үү.