Засгийн газрын ээлжит хуралдаан эхэлж, 21 асуудлыг хэлэлцэн, шийдвэрлэнэ. Үүний дотор Цар тахлын хуультай холбогдуулан шалгаруулалтгүйгээр томилсон албан тушаалтнуудыг чөлөөлөх юм. Энэ талаар ЗГХЭГ-ын дарга Д.Амарбаясгалан “Цар тахлын хуультай холбогдуулан түр томилогдсон албан тушаалтнуудыг нэгдүгээрт, үүрэгт ажлаас нь чөлөөлнө. Хоёрдугаарт, Төрийн албаны зөвлөлөөс тус ажлын байруудад нээлттэй сонгон шалгаруулалт зарлана. Одоогийн байдлаар  Төрийн нарийн бичгийн дарга долоо, агентлагийн 11 дарга Засгийн газрын томилгоогоор ажиллаж байна. Түр томилгоо гэсэн үг. Харин эдгээр хүн төрийн албаны шалгалтаа өгөөд тэнцсэн, ажлын байрны шаардлагыг бүрэн хангаж буй тохиолдолд эргэн ажиллах боломжтой​”гэлээ.