Шинэ хичээлийн жил эхлэхээс урьтан сургууль цэцэрлэгүүд урсгал засвар хийдэг билээ. Тэгвэл энэ жил сургууль цэцэрлэгийн урсгал засварт дөрвөн тэрбум төгрөг төсөвлөсөн байна.

117 сургууль, 149 цэцэрлэгийн урсгал зардалын ажил 80 хувийн гүйцэтгэлтэй яваа аж. Урсгал засварын ажлыг ирэх наймдугаар сарын 1-нд дуусгах чиглэл өгсөн бөгөөд хавдар үүсгэгч бодис болох дэгдэмхий органик нэгдлүүд бүхий бензол, формальдигед хэмээх бодисуудыг агуулдаг чанаргүй будаг, цавууг анги засварт ашиглахгүй байхыг зөвлөжээ.

Ялангуяа будсаны дараа дээрх бодисууд агаарт дэгдэж, хугацаа өнгөрөхийн хэрээр хоруу чанар нь багасдаг ч манайд хичээл эхлэхтэй зэрэгцэн намар засвар хийж байгаа нь бас нэг асуудал болсоор удсан.

Завсар хийх явцдаа агааржуулалтын хоолойг таглаж хаадаг зэргээс шалтгаалан хүчилтөрөгч дутагдсан хүүхдийн сурах, сэтгэн бодох чадвар сулардаг учир хүний биед нөлөөгүй будаг сонгох, засварыг хичээл орохоос өмнө эрт хийх, засвар хийхдээ агааржуулалтын системээ ажиллаж байгааг шалгаж хэвийн ажиллуулах хэрэгтэйг мэргэжилтнүүд дурдлаа.