Ойрын хугацаанд орсон борооны улмаас Сэлбэ, Бэлтэс, Хараа, Орхон, Онон, Туул зэрэг голууд үерийн түвшнээс 5-25см давж, Чулуут, Идэр, Заг, Богд гол өмнөх өдрөөс 10-45см нэмэгдээд байна. Өнөөдөр зүүн аймгуудын нутгаар дуу цахилгаантай усархаг бороо орж голуудын түвшин эрс нэмэгдэх, гуу жалга дагасан үер буух эрсдэл өндөр байгаа тул иргэдийг сонор сэрэмжтэй байхыг УЦУОШГазраас анхаарууллаа. Өнгөрсөн шөнө Өвөрхангайн Есөнзүйл, Өлзийт, Бүрд орчмоор 40,0-57,0 мм, Булганы Бүрэгхангай, Гурванбулаг, Бугат, Хишиг-Өндөр, Орхон, Булган, Сэлэнгийн Сүхбаатар, Орхонтуул, Хэнтийн Дадал, Дарханы Шарын гол орчмоор 25,0-34,0мм, бусад хэсгээр 0.0-24,0 мм бороо, дуу цахилгаантай аадар бороо орсон байна.