Монгол кино анх удаа 80 дахь удаагийн Венецийн олон улсын кино наадмаар дэлхийн нээлтээ хийнэ. Монгол найруулагч П.Лхагвадуламын “Сэр сэр салхи" уран сайхны киног

2023 оны долдугаар сарын 25-ны өдөр 80 дахь удаагийн Венецийн олон улсын кино наадмын  "Оризонти" уралдаант хэсэгт сонгож буйг захирал Алберто Барбера дэлхий нийтэд зарласан байна.

Венецийн олон улсын кино наадам нь дэлхийн А зэрэглэлийн кино наадмуудын нэгд зүй ёсоор тооцогддог.

Нэр хүндтэй энэ наадамд анх удаа монгол найруулагчийн бүтээл албан ёсны хөтөлбөрт сонгогдон, наадмын дээд шагналын төлөө өрсөлдөх эрхтэй болсон нь Монголын кино урлагийн түүхэнд тэмдэглэгдэн үлдэх үйл явдал юм.

"Сэр сэр салхи" кинонд онгод тэнгэрийн ивээл болон бүдэг бадаг ирээдүйн дунд өөрийгээ хайх 17 настай бөө хүүгийн тухай өгүүлдэг. Уг уран сайхны кино нь залуу найруулагч П.Лхагвадуламын анхны бүрэн хэмжээний кино бүтээл бөгөөд түүнийг Английн кино урлагийн мэргэжлийн нэр хүнтэй "Screendaily" сэтгүүл 2023 онд хамгийн их хүлээлттэй 18 залуу найруулагчийн нэгээр нэрлэж байв. Залуу найруулагч П.Лхагвадулам нь “Есдүгээр сарын цас” богино хэмжээний киногоороо 2022 оны Венецийн наадмын шилдэг богино хэмжээний “Алтан Арслан” шагналыг хүртсэн анхны Монголын уран бүтээлч болж байсан бахдам амжилттай уран бүтээлч юм.