Булган аймаг энэ жил 55.5 мянган га талбайд тариалалт хийсэн байна. Урьдчилсан балансаар 37 мянган га талбайгаас 50 мянган тн улаанбуудайн ургац хураан авах тооцоо гарчээ.

Сүүлийн өдрүүдэд үргэлжлэн унасан хур тунадасны улмаас ургац хураалт удааширсан хэдий ч тооцоолсон ургацыг хураан авч, аймгийн хэрэгцээг бүрэн хангана гэсэн итгэлтэй байгаагаа Булган аймгийн Засаг даргын орлогч Д.Жаргалсайхан хэллээ.

Энэ жил нэгж талбайгаас хураан авах ургацын хэмжээ өндөр байгаа хэдий ч ургац хураалт удааширсантай холбогдуулан малчдын нүүдэлтэй давхцах нөхцөл үүсээд байгааг “Эг тариа” ХХК-ийн агрономич Р.Сод-Од энэ үеэр хэлж, олон жил малчид, тариаланчдад тулгамдаж буй энэ асуудалд төр, засгаас бодлогын дэмжлэг хүслээ.

Түүнчлэн төр, засгаас улаанбуудайн хэрэгцээг импортоор биш, зөвхөн дотоодын ургацаас хангах бодлогыг барьж байгааг хэллээ.