Улаанбаатар хотын захирагчийн ажлын албанаас халтиргаа, гулгаанаас сэргийлэх зорилгоор “Ердөө 90 мин” бүх нийтийн их цэвэрлэгээг өнгөрсөн долоо хоногийн баасан гаригт зохион байгуулсан. Энэ талаар өнөөдөр болсон Нийслэлийн удирдах ажилтнуудын Шуурхай зөвлөлгөөний үеэр Улаанбаатар хотын ерөнхий менежер бөгөөд захирагчийн ажлын албаны дарга М.Баяраа  танилцууллаа. Баасан гаригт 11:00-12:30 цагийн хооронд зохион байгуулсан бүх нийтийн их цэвэрлэгээнд 13.645 байгууллага, 37.290 хүн оролцож, 2.5 сая ам.метр талбайн 736.4 тонн хог хаягдлыг цэвэрлэжээ. Нийслэлийн хэмжээнд хот тохижилт, цэвэрлэгээ үйлчилгээний 26 байгууллага үйл ажиллагаа явуулж байгаагаас 347 жолооч, 527 ачигч, зам талбайн үйлчлэгч 577 байдаг байна. Улаанбаатар хотын хог хаягдлын байгууламжийг шинэчлэх төслийн хүрээнд 20 машин механизм, 226 техник хэрэгсэл шаардлагатайгаас гадна ажилчдын хувцас хэрэгслийг мөн шинэчлэх хэрэгтэй байгааг дурьдлаа.