Сүхбаатар дүүрэгт таван ханатай гэр шатаж, нэг хүн өртөн харамсалтайгаар амь насаа алджээ. Тодруулбал, Улаанбаатар хот, Сүхбаатар дүүрэг, 15 дугаар хорооны Усан сангийн задгайд гэр шатаж байна гэсэн дуудлагыг аравдугаар 29-ний өдрийн 16:14 цагт Онцгой байдлын ерөнхий газар хүлээн авчээ. Дуудлага мэдээллийн дагуу тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 3 км замыг туулан 16:20 цагт очиход иргэн Т-ын 5 ханатай гэр, эд хогшил бүрэн шатаж байсныг 20 минут ажиллаж унтраасан. Уг гал түймэрт иргэн Н/40 настай, эмэгтэй/ өртөж нас барсан тул цогцсыг гаргаж тус дүүргийн Цагдаагийн 2 дугаар хэлтэст шилжүүлэн өгсөн байна.