“Нүүрсний” сонсголын хоёрдахь шат үргэлжилж байна. Энэ үеэр улсын хилээр бүртгэлгүйгээр их хэмжээний нүүрс гаргасан компаниудыг танилцуулж, улс төрийн хамаарлыг нь шинжээчид зарласан юм. Үүнд, хамгийн олон давтамжтай их хэмжээний нүүрсийг хил гаалиар гаргасан байж болзошгүй компаниудыг нэрлэхэд Ц.Амгалан Үндэсний статистикийн дарга Б.Батдаваагийн эхнэрийн нэр дээрх компаниуд толгой цохиж байлаа. Түүний дараа УИХ-ын гишүүн Ш.Адьшаа болон түүний зөвлөх Г.Мөнхцэцэг, УИХ-ын гишүүн Б.Бат-Эрдэнэ гишүүн Б.Баттөмөрийн хүү, ЗГХЭГ-ын дарга Д.Амарбаясгалан, Р.Бадрал гишүүн асан Бурмаагийн хүү, А. Адъяасүрэн нарын хамаарал бүхий компаниуд орж байна. Түр хороог даргалагч Б.Энхбаяр “ҮСГ-ын дарга Б.Батдаваагийн эхнэр Ц.Амгалангийн компаниуд нийлбэр дүнгээр 1 сая тн нүүрс гаалийн бүрдүүлэлтгүй гаргасан” гэж дүн мэдээг шинжээчид танилцууллаа гэв. Мөн ҮСГ-ын дарга Б.Батдаваагийн эхнэр Ц.Амгалангийн эзэмшлийн Дэлгэрэх цагаан овоо ХХК 430 удаа С зөвшөөрөл авчээ.