Монголын триатлоны холбооны 20 жилийн ойд зориулсан цувралыг эхлүүлж, Өвлийн триатлоны анхдугаар тэмцээн “Мишээл” байгаль орчин, танин мэдэхүйн хүрээлэнд болж өндөрлөлөө.

Монголын триатлоны холбоо, “Сандагаа багш” цана, дугуйн холбоотой хамтран зохион байгуулсан анхдугаар тэмцээнд тамирчид нэг км гүйж, хоёр км дугуй жийж, хоёр км цанаар уралдав.

Өвлийн триатлоны салхийг хагалсан энэхүү тэмцээнд эрэгтэйчүүдээс “Роүд Монголиа” клубийн Н.Алтаншагай, “Цасан зам”-ын Г.Төгөлдөр, “Роүд Монголиа”-гийн Л.Баярцэнгэл нар тэргүүлсэн бол эмэгтэйчүүдээс “Цасан зам” клубийн А.Анхилуун, Б.Халиунаа, Н.Энхжин нар эхний гурван байрт шалгарлаа. Уг тэмцээн нь улсын аваргын өмнөх сорил гэдгээрээ онцлогтой.

Сонирхуулахад, ирэх сарын 24-нд “Мишээл” танин мэдэхүйн хүрээлэнд өвлийн триатлоны анхдугаар улсын аварга шалгаруулах тэмцээн болно. Тэмцээнд оролцогчид хоёр км гүйж, дөрвөн км дугуй жийж, дөрвөн км цанаар уралдах ажээ.