Сонгинохайрхан дүүргийн 18 дугаар хорооны Таван шарын автобусны зогсоол дээр тохилог, дулаан автобусны буудал шинээр байршуулжээ. Ийм жишиг автобусны буудлыг тус дүүргийн 10 байршилд байршуулах юм байна.

Жишиг автобусны буудал нь дулаан өрөө, саравч болон зам талбайн үйлчлэгч нарт зориулсан хэсэгтэй. Мөн гадаа талбай, дотор орчныг хамгийн сүүлийн үеийн камераар хянах боломжтой бөгөөд тус хорооны Засаг дарга, хорооны цагдаагийн албан хаагчид хариуцан ажиллах аж.

Жишиг автобусны буудлыг 22 ширхэг түргэн үйлчилгээний цэг чөлөөлсөн талбайд байршуулсан бөгөөд таван шарын автобусны энэхүү буудал нь замын хөдөлгөөний оргил ачааллын үед хамгийн олон хүн дамжин өнгөрдөг, олон чиглэлт уулзваруудын нэг юм.

Дүүргийн орон нутгийн төсвийн хөрөнгөөр хийж буй жишиг автобусны буудлуудын байршлыг сонгохдоо зорчигчид ихээр төвлөрдөг, сургууль, цэцэрлэгтэй ойр хэсгүүд болон алслагдсан хороодын нутаг дэвсгэрийг харгалзан баталсан байна. Дараагийн жишиг есөн автобусны буудлыг ирэх дөрөвдүгээр сарын 1-нд хүлээн авч ашиглалтад оруулна.