Эмэгтэйчүүдийн гоо зүйг бүрдүүлдэг нэгээхэн хэсэг нь хумсний маникур, педикур байдаг. Тэгвэл энэ нь гоо зүйн талаасаа хэрэгтэй мэт боловч эрүүл мэндийн талаасаа багагүй хор хөнөөлтэй ажээ. 
Нийслэлийн хэмжээнд “Арьсны өвчин судлалын үндэсний төв”-д хумсны гэмтлээс үүдэн жилд 200 орчим иргэд ханддаг байна. 
Хумсыг гелэн будгаар будуулсан тохиолдолд 15 хоногоос дээшгүй хугацаанд зориулалтын багаж, хэрэгслээр салгуулах хэрэгтэй. Будгаа салгуулсны дараагаар хамгийн багадаа гурваас дөрвөн сарын хугацаанд хумсаа будуулахгүй амраах нь чухал юм. 
Гелэн будгаар хумсаа тогтмол будуулснаар хумсны гадарга нимгэрч, толионы өнгө өөрчлөгдөн, хумсны бүтцийн хэлбэрт өөрчлөлт үүсдэг байна. Түүнчлэн хумсны гадаргын давхарга зузаарч, амархан хугарч, гэмтэх эрсдэл үүсдэг. 
Хумс нь будуулсны дараа зургаан сарын хугацаанд бүрэн нөхөн төлжиж дуусдаг байна. Гэвч иргэдийн энэ талаарх мэдлэг, мэдээлэл төдийлөн сайн байдаггүй учраас хумсны гэмтлээ даамжирсны дараа л эмчид хандах нь бий. Тиймээс өвчлөлөөс урьдчилан сэргийлэх үүднээс үзлэг үйлчилгээнд хамрагдаж, өвчилсөн тохиолдолд цаг алдалгүй эмчид хандах шаардлагатай.