Өнгөрсөн баасан гарагт “Чингис хаан” ОУ-ын нисэх буудлаас 30 орчим кг допингийн төрлийн бодис хураан авсан талаар мэдээлж байсан.  Тухайн бодисыг хар өнгийн чемоданд хувцас, уух зүйлийн хамт хийсэн байсан нь шалгалтаар тогтоогдсон. Уг бодисыг тээвэрлэгч нь нэр бүхий тамирчин байсан бөгөөд өдгөө шалгагдаж байгаа тул нийтэд дэлгэх боломжгүй гэж эх сурвалж мэдээллээ. 
ДОПИНГИЙН ШИНЖИЛГЭЭ БУДИЛУУЛДАГ БАЙСАН  БӨХЧҮҮД ТЭЭВЭРЛЭГЧ БОЛЖ БАЙГАА ЮМ БИШ БИЗ 
“АТГ-ын Мөрдөн шалгах хэлтсээс Үндэсний их баяр наадмын үндэсний бөхийн төрөлд барилдан тав болон түүнээс дээш  давж шөвгөрсөн 16 бөхөөс сэргээшийн шинжилгээний сорьц авах Ажлын хэсгийн нэр бүхий албан тушаалтнууд нь шинжилгээний сорьцыг өөрчлөх, Дэлхийн допингийн эсрэг агентлагийн итгэмжлэгдсэн лабораторийн шинжилгээний хариуг хууль бусаар өөрчилж, олон нийтэд худал мэдээлэл тарааж, төөрөгдөлд оруулах замаар албан үүрэг, бүрэн эрх, албан тушаалын байдлаа урвуулан их хэмжээний хахууль авсан нь 2019 оны наймдугаар сарын 23-ны өдрийн хяналтын камерын бичлэгээр тогтоогдсон байдаг.  Түүнчлэн өнгөрсөн намар үндэсний бөхийн дасгалжуулагч М.Батням нарын таван хүний гэрээс допингийн бодис нэгжлэгээр ил болж дуулиан тарьж байлаа. Дасгалжуулагч М.Батням нэр бүхий тамирчдад тариа хийдэг байснаа ч хүлээн зөвшөөрсөн. Тэгвэл өдгөө багш, дасгалжуулагч нар допингийн бодис оруулж ирэх бус шавь нар нь энэ төрлийн бизнест хөл тавьсан байж болзошгүй талаар эх сурвалж онцолж байна.