Авлигатай тэмцэх газар өчигдөр хийсэн мэдээллийнхээ үеэр битүү, хатуу хэд хэдэн баримт, бичлэгийг дэлгэсэн. Тэдний дунд нэр бүхий төрийн өмчийн хувьцаат компанийн удирдах албан тушаалтан нь хахуулийн 5.4 тэрбум төгрөгөөр Сүхбаатар дүүргийн I хороонд оффис худалдан авч түүнийгээ цааш түрээслэн мөнгө угаасан нөхцөл байдал тогтоогдсон хэмээсэн билээ.  Барилгын зураг хөргийг ч дэлгэж, үзүүлсэн. Энэ нөхөр хэн байж таарах вэ гэдэг таамаглал ч дагаад хөвөрсөн.

Тэгвэл АНУ-руу оргон зугтаад сураг нь алдарсан Н.Удаанжаргал  хэргийн эзэн байх магадлал өндөр аж. Тэрбээр Тэрбээр Сүхбаатар дүүргийн I хорооны нутаг дэвсгэрт байрлах "Regis Place"-т оффисын зориулалт бүхий талбайгаас 464.5 м2 бүхий оффисыг 2.5 тэрбумаар, мөн 530.9 м2 бүхий оффисыг 2.9 тэрбумаар худалдан авч, түүнийгээ бусдад түрээслэх замаар 1.1 тэрбум төгрөгийн ашиг олсон гэсэн мэдээлэл байна. ТӨХК-ийн удирдах албан тушаалтан гэдэг нь ч түүнийг гэдгийг хэлээд өгч буй юм. 

Мөн хамаарал бүхий этгээдийнхээ нэр дээр үнэт цаас, бонд худалдан авсан хэмээн АТГ-ын мэдэгдсэн нөхөр ч тэрбээр байж болзошгүй аж.
 
Н.Удаанжаргалд холбогдох хэргийг мөрдөн шалгах ажиллагаа үргэлжилж байгаа хэмээн АТГ мэдэгддэг ч хэргийн эзэн, хэнгэргийн дохиур оргон зайлсан. Цаашид энэ хэвээр байвал Интерполд хандах нөхцөл байдал үүсэж болзошгүй хэмээн албаныхан мэдэгдсэн билээ.