Сүүлийн өдрүүдэд хүйтний эрч эрс чангарснаас сурагчдын өвлийн амралтын хугацааг ядаж долоо хоногоор сунгая. Томуу, томуу төст өвчний гаралт ихэсч, эмнэлгүүд хүүхдээр дүүрлээ хэмээн эцэг, эхчүүд сошиалаар давалгаалж, холбогдох яам, сайдад хандсан билээ.

Энэ талаар БШУ-ны сайд Л.Энх-Амгалан: “Энэ бол хуучирсан сэтгэлгээ. Цаг уурын нөхцөл байдал, замын түгжрэл, өвчин, зовлонгоос үүдэж, сургууль хойшилдог байж болохгүй. Ковидын үед манай улс хамгийн олон хоног сургуулиа хаасан. Энэ үеийн хоцрогдолтой бүхэл бүтэн нэг үе гарч ирэх гээд байна. Тиймээс нэг өдрийн, нэг цагийн хичээлийг алдаж болохгүй. Юм л болбол хичээл, сургуулийг зогсооё, хаая гэж ярьдгаа одоо болих хэрэгтэй. Эцэстээ зун хичээллүүлдэг болгоё гэж хүртэл ярих боллоо.Түүн шиг худлаа юм байхгүй, байх ч ёсгүй” гэлээ.