Цахим сүлжээнд олон нийтийн үгээ хэлэх, үзэл бодлоо илэрхийлэх эрхийг боомилсон хууль ихээхэн шүүмжлэл  дагуулж байна. Өдгөө ганц найдвар нь Монгол Улсын Ерөнхийлөгч У.Хүрэлсүх болсон бөгөөд түүнийг бүхэлд нь болон хэсэгчлэн хориг тавиасай хэмээн хүсэгчид олон байна. Тэдний нэг “Шар айраг” хамтлагийн дуучин, “Үүргэвчтэй аялал”-ын Ц.Ганхүү цахим хуудастаа “"Оюутан цагийн найз Монгол Улсын Ерөнхийлөгч Хүрэлсүхээ, чи бид хоёрт оюутан цагтаа сайхан нөхөрлөж байсан үе, шар айраг хувааж уугаад чехүүдтэй гар зөрүүлж, банзан гитараа нүдэж, машин тэрэгний наймаа хийж явсан үе хүртэл бий. Чамайг Монгол Ардын намын гишүүн болсон цагаас хойш, ялангуяа дарга, цэрэг, Генсек, Ерөнхий сайд, Ерөнхийлөгч болоход чинь ч хүртэл нэг ч удаа уулзаж, юм гуйж байсангүй ээ. Монгол Улсын Ерөнхийлөгч болоод Төрийн наадмын хүлээн авалтад урихад чинь Ёс ёмбогор, Төр төмбөгөр гээд очсон биш, ганц тагш шар айраг уугаад 10 минут саатаад гарсан биш долоогч, бялдуучаараа дуудуулаад ардын дайсан болсон. Одоо харин оюутан цагийн найзын хувьд нэг гуйлт байна. Н.Учрал гишүүний яаран сандран оруулж ирсэн, ард иргэдийнхээ санаа бодлыг боомилох гэсэн, Ардчилсан улсын үнэт зүйлд биш зөвхөн тоталитар улсад л байхуйц энэ хуульд хориг тавина гэж найдъя, өнөөдөр сүүлийн өдөр нь юм байна, Оюутан цагийн найз Ганхүү" гэжээ.