Санхүүгийн зохицуулах хорооноос анхааруулж, сэрэмжлүүлсээр атал “Понзи схем”-ээс олон хүн хохирч хоцорчээ.  Монголд орж ирээд хоёр сар гаруйн хугацаанд гэхэд л 36 сая ам.доллар  буюу 125 тэрбум 280 сая төгрөг төвлөрүүлэн хэтэвчээ зузаалаад залилагчид оргон зугтсан байна. 

Тодорхой ажлын байр оффисгүй, толгойлогч гэж хүн байх ч түүнтэй нүүр тулан уулзаж, ярилцсан хүн байхгүй. Хий хоосон агаарын луйврын залиланд олон иргэн хамгаа бариад туучихжээ. 

“Бэлтэс мөрөн” сүлжээний залилангийн луйварт байдгаа өгч хоосорсон хөвсгөлчүүд  гандан буурахгүй “Понзи схем”-д ч мөнгөө өгч, хохирсон байна. Цагдаагийн байгууллагад хохирсон иргэд эхнээсээ хандаад эхэлсэн ба өмнөх хэргүүд нь дуусаагүй байтал араас нь энэ мэт залилуулсан  иргэдийн гомдол тасрахгүй нь бололтой. 

Хэлж, сануулсаар атал хөнгөн хялбар аргаар хөлжих гэсэн манайхны ядруу сэтгэлгээнд дөрөөлөн олз хайгчид ийнхүү олширсоор. Хамгийн харамсмаар нь, байдгаа шавхан сүлжээний луйварт өгчихсөн иргэд жагсахаар болсон байна. Тэд хэнээс хохирлоо, мөнгөө нэхэх вэ.