Засгийн газрын ээлжит хуралдаан өнөөдөр болно. Хуралдаанаар Ипотекийн зээлийн найман хувийг зургаа болгохтой холбоотой асуудлаар холбогдох  албан тушаалнуудаас мэдээлэл сонсоно гэсэн чимээ байна. 

Монгол Улсад өнөөдрийн байдлаар арилжааны банкууд 109048 иргэнд 6.3 их наяд төгрөгийн орон сууцны зээл олгожээ. Үүний 64220 нь найман хувийн хүүтэй Ипотекийн зээлд хамрагджээ. Эдгээр иргэний зээлийг зургаан хувь рүү шилжүүлэх, зөрүү хоёр хувийг зээлд шингээх асуудлыг Шадар сайд С.Амарсайхан ажил хэрэг болгох гэж зүтгэж буй. Ипотекийн зээлтэй иргэдэд энэ нь сайхан мэдээ. Тиймдээ ч Барилга, хот байгуулалтын сайд Ц.Даваасүрэн "Ерөнхий сайд энэ асуудлыг судалж танилцуулах чиглэл өгсөн. Удахгүй Засгийн газраар ярих байх. Ирэх жилүүдэд Ипотекийн зээл олголтыг өмнөх жилүүдээс бууруулахгүй байхаар төлөвлөж байна" гэсэн юм.