Засгийн газрын өнөөдрийн хуралдаанаас гаргасан шийдвэрийн талаар салбарын сайд нар мэдээлэл өглөө. Тухайлбал, Хууль зүй, дотоод хэргийн сайд Х.Нямбаатар яамнаас нь боловсруулсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн нэмэлт, өөрчлөлтийг дэмжиж, УИХ-д өргөн мэдүүлэх болсноо зарлалаа. Үүнд, “Улс төрд нөлөө бүхий зарим этгээд гэдэгт УИХ-ын гишүүн Ерөнхий сайд, Засгийн газрын гишүүн, аймаг, нийслэлийн Засаг дарга, тэдний эхнэр, нөхөр, хамтран амьдрагч, тэдний хүүхдүүд” гэж тодорхойлсон. Нэгдүгээрт, тэд төрийн өндөр албан тушаал хашихыг хориглоно. Мөн төрөөс хэрэгжүүлж байгаа бүх төрлийн төсөл хөтөлбөр, хөнгөлөлт тусламж, гадаад, дотоодын зээлд хамрагдахгүй байхаар хязгаарлаж өгч байна. Мөн төрийн тендер, сонгон шалгаруулалтад аж ахуйгаараа оролцохгүй байх зохицуулалтыг оруулсан. Хэрвээ улс төрд орохоор шийдсэн бол энэхүү хязгаарлалтыг хүлээн зөвшөөрсөн байх ёстой. Сонголт нь тэдэнд байна гэв. 
Энэ удаад Ерөнхийлөгчийг оруулж ирээгүй тухайд Х.Нямбаатар сайдаас хэвлэлийнхэн лавлахад “Монгол Улсын Ерөнхийлөгч гэдэг албан тушаал бие даасан хуультай. Улс төр, соёлын хувьд манлайлал үзүүлэх ёстой. Нэг үгээр бол, уг албан тушаалтан бүхний тэргүүнд, манлайд явах учраас хязгаарласан, хязгаарлаагүй ухамсраараа энэ бүхнийг мөрдөж явна гэж үзээд хассан гэдгийг тодотгоё гэв.