Нийслэлийн удирдах ажилтнуудын шуурхай зөвлөгөөн өнөөдөр болж, Тээврийн цагдаагийн албаны Замын цагдаагийн газрын Нийслэлийн замын хөдөлгөөний хяналт, зохицуулалт хариуцсан дэд дарга Ч.Батболд дараах мэдээллийг өглөө. Тэрбээр “Өнгөрсөн 14 хоногийн хугацаанд дуудлага мэдээлэл өсч, зам тээврийн ослоос урьдчилан сэргийлэх хяналт шалгалтыг эрчимжүүллээ. Тухайлбал, 880 орчим цэгт 506 алба хаагч ажиллаж, 50 мянга гаруй зөрчил илрүүлсэн. Телекамер буюу e-police аппликэйшнээр 43 мянга гаруй зөрчил илрүүллээ. Мөн согтуугаар тээврийн хэрэгсэл жолоодсон 606 иргэнд арга хэмжээ авсан ба урьдчилан сэргийлэх  зорилгоор баасан гараг бүр хяналт шалгалт хийнэ. Зах, худалдааны төвийн өргөтгөсөн худалдаа зохион байгуулж байгаа газар нэмэлтээр цагдаагийн алба хаагч ажиллуулж эхэлсэн” гэв.