Энэ сарын 2-ны өдрийн Засгийн газрын хуралдааны үеэр МУ-ын Ерөнхий сайд Ж.Оюун-Эрдэнэ авлига, албан тушаалын хэрэгт сэжигтэн, яллагдагчаар шалгуулж байгаад оргон зайлсан нөхдийг Олон улсын гэрээ, конвенцийн дагуу ойрын хугацаанд эх оронд нь авчирч, цаашлаад зохих хариуцлага, ял шийтгэлийг нь хүлээлгэхийг үүргэдсэн. Мөн энэ үеэр нүүрсний хулгайн хэргийг хянан шалгах ажлын хэсгийг өргөтгөж, ГХЯ-аас эхлэн бусад холбогдох төрийн байгууллагуудыг дээрх асуудлын хүрээнд дэмжлэг үзүүлж, шаардлагатай мэдээллээр хангаж, ажиллах чиглэл өгч байсан юм. Энэ дундаа нүүрсний хэрэгт холбогдох “Эрдэнэс Тавантолгой”-н захирал асан Н.Удаанжаргал, хилийн цаанаас мэдэгдэл хийж суудаг Ерөнхий сайд асан Ч.Сайханбилэг, казино хэсэж, мөрийтэй тоглож явдаг Т.Бадамжунай нарыг интерполоор эрэн сурвалжилна гэсэн мэдээ хэвлэлүүдээр цацагдаж эхэлсэн юм.

Тэгвэл “Тавантолгой төмөр зам” ХК-ийн гүйцэтгэх захирал Н.Удаанжаргалыг прокуророос яллагдагчаар татаж, интерполоор сурвалжилж эхэлсэн байна. Түүнийг БНСУ-аар дамжин АНУ-руу оргон зайлсан байж болзошгүй нөхцөл байдал тогтоогдсон юм.