Хүүхэд бүрд сар болгон 100 мянган төгрөгийн тэтгэмжийг улсаас олгодог. Энэ сарын хүүхдийн мөнгө олгох хугацааг Сар шинийн баяр болох гэж буйтай холбогдуулан урагшлуулж, өнөөдөр олгохоор болсон билээ.

Харин Сангийн сайд Б.Жавхлан “Цагаан сар болох гэж байгаатай уялдуулж, гуравдугаар сарын хүүхдийн мөнгийг хоёрдугаар сарынхтай хамтад нь урьдчилан олгоно" хэмээн мэдэгдсэн. Эцэг, эхчүүдийн дунд ийм хүлээлт үүсгээд байсан ч ХХҮЕГ үгүйсгэлээ. Тодруулбал, Хөдөлмөр, халамжийн үйлчилгээний ерөнхий газрын дарга Т.Бадрахбаяр "Хоёрдугаар сарын хүүхдийн мөнгийг өгөх санхүүжилт орж ирсэн. Монгол Улсын нийт хүүхдийн 91 хувь буюу 1.2 сая орчим хүүхдэд 114 тэрбум төгрөг олгоно. Санхүүжилт нь орж ирсэн учраас хоёрдугаар сарын хүүхдийн мөнгийг өнөөдөр олгоно. Харин гуравдугаар сарын хүүхдийн мөнгийг хоёрдугаар сарынхтай хамт олгох чиглэл бидэнд ирүүлээгүй. Гуравдугаар сарын хүүхдийн мөнгийг олгох санхүүжилт орж ирээгүй” гэв.