АН-ын дарга хэн бэ гэх талцлыг Улсын Дээд шүүх нэг талд нь гаргасан. Гэвч тус намын хэрүүл тэмцэл дундраагүй харин ч эрчимжсэн гэж болно. Даргын асуудлыг шийдчихлээ гэхэд Лу.Гантөмөрийн фракц орох оронгүй байв. Харин Ерөнхийлөгч асан Х.Баттулга Төв шуудангийн урд байрлах С.Зориг агсны хөшөөний зэргэлдээх байранд үйл ажиллагаа явуулах эрхийг  Лу.Гантөмөрт өгч, түүнийг хэн сойсныг ил гаргачихлаа.

Х.Баттулгын АН-ын үйл ажиллагаагаа явуулж байсан тус байр "Шинэ дэвшилт холбоо"-ны өмчлөлд бүртгэлтэй бөгөөд газрыг нь Голомт банкны эзэн Д.Баясгалан эзэмшдэг байна. Нэг үгээр бол, тус байр нь Х.Баттулгын болоод АН-ын өмч биш. Түрээсээр үйл ажиллагаа явуулж иржээ.