Нийтийн тээврийн бодлогын газар, "Улаанбаатар смарт карт" компаниас автобусны үнэ өсч байгаа талаар мэдээллээ. Тодруулбал, ирэх Бямба гаригаас /2025.02.01/ автобусанд том хүн 1000 төгрөгөөр, хүүхэд 200 төгрөгөөр зорчино.

Чиглэлийн тариф болох 1000 төгрөгийг нэг удаа төлсөнөөр иргэд тухайн өдрөө гурван удаа автобусанд суух боломжтой аж. Гэхдээ автобуснаас буухдаа төхөөрөмжид картаа уншуулаагүй тохиолдолд хөнгөлөлт үйлчлэхгүй бөгөөд дахин 1000 төгрөг төлж зорчино гэдгийг анхаарууллаа.

НИТХ-аас тогтоол гаргаж, нийтийн тээврээр үйлчлүүлэх үнийн тарифт зарим өөрчлөлт оруулсан. Тогтоол 2025 оны нэгдүгээр сарын 1-нээс хэрэгжиж, иргэд автобусанд суухдаа 1000 төгрөг төлж зорчихоор байсан ч тодорхойгүй хугацаагаар хойшлуулсан билээ. 

Шинэ тарифаар Ч, М, Д, Ү, Х, Шү, Зү чиглэлийн бүх автобусанд том хүн 1000, хүүхэд 200 төгрөг төлж зорчино. 

Өмнө нь 30 минутын дотор дамжин суусан тохиолдолд үнэгүй зорчдог байсныг тухайн өдөртөө болгон өөрчлөн зохицуулжээ. Ингэхдээ буух бүрдээ төхөөрөмжид автобусны картаа дарснаар дамжин суух хөнгөлөлтийг эдлэх юм байна. Түүнчлэн дамжих хөнгөлөлт өмнө нь ижил чиглэлд үйлчилдэггүй байсан. Харин шинэ тарифын мөрдлөгөөр ижил чиглэлд ч дамжин суухдаа хөнгөлөлт эдлэх боломжтой болжээ.

Харин “Чингис хаан” олон улсын нисэх буудал руу явдаг X:19 чиглэлийн автобусанд том хүн 15000, хүүхдэд 7000 төгрөгөөр зорчих юм. Энэ нь Д.Сүхбаатарын талбайгаас нисэх онгоцны буудал руу явдаг чиглэл аж.