Манай улсын хэмжээнд байнгын асаргаа шаардлагатай 11.400 орчим хүүхэд байдаг судалгаа байна.  Байнгын асаргаа гэдэгт хүүхэд өөрөө бие дааж алхах, гишгэх, хооллох, бие засах, ярих, өөрийгөө ойлгуулж чадахгүй, өөрийн насандаа орчинтой харьцах хэмжээнд байх чадваргүй, мөн байнгын хэвтэрт байдаг, саажилттай зэрэг хүүхдүүд ордог байна. Ийм хүүхэдтэй асран хамгаалагч үргэлжийн дэргэд нь байж харж хандахаас гадна хүүхэд энгийн цэцэрлэг, сургуульд хамрагдах боломжгүй тул, хэрвээ эцэг эх нь хүсвэл тусгай мэргэшсэн багш сэргээн засах эмч, эмчилгээ, зөвлөхтэй төвүүд өдөр өнжүүлэхэд хамрагдах боломжтой юм. Харин улсын хэмжээнд байнгын асаргаа шаардлагатай хүүхдүүдийн өдөр өнжүүлэх төв 800 орчим бүртгэлтэй байдгаас, тогтмол үйл ажиллагаа явуулдаг 10 -аад төв байна.  
Эдгээрээс “Ээлтэй ертөнц” ТББ нь 0- 17 насны хүүхдүүдийг хүлээн авч, өвчлөл тус бүрт нь тохирсон сэргээн засах эмчилгээ хийж асрахын зэрэгцээ, гэртээ хүүхдээ хараад суудаг байсан ээжүүдийг нь төвийнхөө тусгай сургалтад хамруулж, ажил эрхлэх боломжоор хангаж байгаагаараа онцлог юм. Тодруулбал, тус төвийн хүүхдээ асруулдаг аав, ээжүүд нийлж “Ханни зөөлөн тоглоом”-ын үйлдвэрийг ажиллуулж байна. Ээж, эхчүүдийн урласан олон төрлийн зөөлөн тоглоомыг худалдан борлуулж, төвийнхөө хүүхдүүдийн хоол хүнс, хэрэглээ, шаардлагатай эм тариа, урсгал зардал төдийгүй ээжүүдийн цалин хөлсийг олгох нөхцлийг бүрдүүлжээ.