Меган Карнеги: “Бараг бүх ажилчид эдийн засгийн хүндрэл, мэргэжлийн дарамтыг даван туулахын тулд тэмцэж байна. Гэсэн хэдий ч хамгийн залуу ажилчид энэ дарамтыг хэнээс ч илүү мэдэрч байж магадгүй юм”.

Сүүлийн хэдэн жилүүдэд зарим улс орны эдийн засгийн байдал дордож, үймээн самуун ихээр дэгдэж байгаа нь хөдөлмөр эрхлэгчдэд хүндрэлтэй байдлыг үүсгэх болсон. Тухайлбал үүнтэй холбоотойгоор ажлын байрны цомхотгол олширч, инфляцийн өсөлтийг ч дийлэхээ больж байгаа нь тун эмзэглүүштэй.

Түүчлэн коронавирусийн цар тахал гарснаар дөнгөж сургуулиа төгссөн залуу үеийнхний карьерт сөргөөр нөлөөлж, тэднийг хүнд байдалд оруулсан билээ.

“Cigna” Олон улсын эрүүл мэндийн байгууллагаас энэ онд дэлхий даяар 12,000 орчим ажилчдыг судалгаанд хамруулсан аж. Судалгааны үр дүнд 18-24 насныхны 91 хувь нь стресст өртөж байгааг тооцоолжээ. Тодруулбал, зохицуулагдах боломжгүй стресс нь Z үеийнхний бараг дөрөвний нэгд буюу 23 хувьд нөлөөлдөг байна. Мөн бараг нийтэд нь буюу 98 хувьд нь ядрах шинж тэмдэг илэрчээ.

20 орчим насны хүмүүсийг ажилд авах талаар компаниудад зөвлөгөө өгдөг судлаач Элиза Филби: "Үндсэндээ хөдөлмөр эрхлэхэд маш хүндрэлтэй цаг үе болж байна. Цомхотголоос үүдэлтэй ажлаасаа халагдсан хүн бүр стрессдэж  байна” гэв.

Хүний нөөцийн программ хангамжийн “Workhuman” компанийн 2023 оны тайлангаас үзэхэд амьжиргааны өртгийн хямрал нь Их Британийн нийт ажилчдын 84 хувийг нь стресс, түгшүүртэй байдалд хүргэх болжээ. Мөн Ирланд, АНУ, Канад зэрэг дэлхийн өнцөг булан бүрт үүнтэй ижил төстэй хандлага ажиглагдах болсон байна.

Эх сурвалж: BBC