УИХ-ын чуулганы өнөөдрийн нэгдсэн хуралдаан эхэлж, Б.Пүрэвдорж гишүүн Тэтгэврийг долоо биш таван жилээр тогтоолгох хуулийг төслийг хэлэлцэх асуудлыг дараалалд оруулж өгөхийг хүслээ. Тэрбээр “Бидний нөхдийн өргөн барьсан Тэтгэврийг тогтоохдоо цалингийн долоо биш таван жилийн дунджаар тогтоох, үүний үр дүнд дундажаар 150 мянга орчим төгрөг тэтгэвэрт гарч байгаа ахмадуудад очих ийм боломжийг бүрдүүлж байгаа.
Энэ хуулийг баталчихвал 2018 оны нэгдүгээр сарын 1-нээс энэ хуулийг батлах хүртэлх долоон жилээр тэтгэврээ бодуулсан тэр хүмүүсийг дахин таван жилээр бодож хохироохгүй байх ийм хуулийн төсөл юм. Ийм хоёр хуулийг яаралтай хэлэлцэх зайлшгүй шаардлагатай байна.
Зарим УИХ-ын гишүүн хөдөө орон нутгаар явахад чиний хуулийг дэмжихгүй байна гэдэг. Яасан худлаа хэлдэг хүмүүс вэ. Аль эсвэл та нар өөрсдийг нь “долоодог” хүмүүстэй уулзалт хийдэг юм байна. Миний очсон газар бүрд энэ хуулиа сайн хийгээрэй гээд “Тэтгэврээ долоо биш таван жилээр тогтоолгоцгооё” группэд ахмадууд өдөр, шөнөгүй сэтгэгдлээ бичиж байна. 
Бүр даваадуулж хэлэхэд 20 тэрбум төгрөгийн л зардал жилдээ гарах байх. Энэ 40 их наяд хулгайны чинь хажууд өчүүхэн мөнгө. Амьд бурхад болсон ахмадууддаа ингэж хатуу хандмааргүй байна. Тиймээс Даргын зөвлөлийн өнөөдрийн хурлаар С.Чинзориг сайдыг шинэхэн дээр нь П.Анужин Байнгын хорооны дарга та хуулийн төслийг анхны хэлэлцүүлэгт нь оруулах санал гаргаад шийдүүлээд өгөөч. Г.Занданшатар дарга аа, таныг хөдөө очиход хүмүүс маш их шаардана. Тиймээс үүнд та анхаарлаа хандуулаач” гэв.
Харин УИХ-ын дарга Г.Занданшатар “Өнөөдрийн хэлэлцэх асуудалтай холбоогүй юм байна” хэмээгээд чуулганы хуралдааныг үргэлжлүүллээ.