УИХ-ын 2022 оны ээлжит чуулганы өнөөдрийн хуралдаанаар "Зөвлөлдөх зөвлөл байгуулах тухай УИХ-ын Тогтоолын төслийг Байнгын хорооны саналаар баталъя" гэдэг томьёоллоор санал хураахад санал хураалтад оролцсон 42 гишүүний 31 нь буюу 73.8 хувь нь дэмжлээ. Тогтоолын төслийг УИХ-ын гишүүн Г.Занданшатар уншиж танилцуулав.  Тэрбээр "Монгол Улсын Их Хурлын тухай хуулийн тав дугаар зүйлийн 5.1, Зөвлөлдөх санал асуулгын тухай хуулийн наймдугаар зүйлийн 8.2, 12 дугаар зүйлийн 12.2, УИХ-ын 2022 оны 80 дугаар тогтоолын тавдахь заалтыг үндэслэн Монгол Улсын Их Хурлаас тогтоох нь:
1. "Зөвлөлдөж шийдье" улсын хэмжээний зөвлөлдөх санал асуулгыг зохион байгуулах зөвлөлдөх зөвлөлийг дараах бүрэлдэхүүнтэй байгуулсугай.
                                   1. Отгондаваагийн Амартүвшин (Эдийн засагч)
                                   2. Гомбосүрэнгийн Галбадрах (Зураг, хөдөлмөрийн багш)
                                   3. Хуягийн Ганбаатар (Арьс, ширэн эдлэлийн инженер, технологич, Монгол Улсын зөвлөх инженер)
                                   4. Өлзийхутагийн Ганхуяг (Эдийн засагч)
                                   5. Цэгмэдийн Мандхайхатан
                                   6. Доржийн Моондой (Радио электроникийн инженер)
                                   7. Одонхүүгийн Мөнхсайхан (Хуульч)
                                   8. Банзрагчийн Отгонтөгс
                                   9. Лхагважавын Төр-Од (Улс төрийн эдийн засагч, эрх зүйч)
                                 10. Гилэгпилийн Чулуунбаатар (Гүн ухаан, нийгмийн ухааны багш, Академич)
                                 11. Сүхбаатарын Эрдэнэбат (Хөдөлмөрийн эдийн засагч)
 
2. Зөвлөлдөх зөвлөлийн тухай хуульд заасан чиг үүргийг хэрэгжүүлэх, санал асуулгын дүнг нэгтгэж, зөвлөмж гарган УИХ-д танилцуулахыг Зөвлөлдөх зөвлөлд даалгасугай гэв.
Энэхүү тогтоолыг 2023 оны нэгдүгээр сарын 6-ны өдрөөс эхлэн дагаж мөрдөх бөгөөд эцсийн найруулгад УИХ-ын гишүүдээс санал гараагүй тул тогтоолыг баталсанд тооцож, алх цохилоо.