Монголд нэг сарын хугацаанд 389 хос гэрлэлтээ цуцлуулдаг гэсэн статистик тоо гарчээ.  Энэ нь архидалт, үнэнч бус байдал, удаан хугацаанд тусдаа амьдарсан гэх шалтгаанаас болдог байна.  Мөн Монголд нийт шийдэгдэж буй хэргийн 12 хувийг гэр бүлийн асуудал эзэлж байна. 
Энэхүү гэр бүл салалтын асуудалд малчин залуус хохирч байгаа нь анхаарал татсан асуудал болон гарч ирлээ. 
Тодруулбал, хөдөөний малчин залуус интернэт ертөнц буюу фэйсбүүк сошиалаар бүсгүйчүүдтэй танилцаж, улмаар гэрлэлтээ батлуулдаг. Энэ нь ердөө нэг жил хүрэхгүй хугацаанд үргэлжилдэг байна. Гэрлэлт нэрийн доор хамт амьдарч байгаад мал хөрөнгөнөөс нь хувааж аваад салдаг аж. Энэ чиглэлээр ажилладаг өмгөөлөгч хүртэл байдаг талаар хөдөөний малчин ээж хохирсон хүүгээ өмгөөлж мэдээллийн хэрэгслээр ярилцлага хүртэл өгчээ.  
Тэгвэл сошиалын танилцах группуудад хүнтэй танилцаж, хамтдаа сайхан амьдрахыг хүссэн малчин залуусыг отож суудаг зарим эмэгтэйчүүд хөдөөний залуусыг урхидаж хэдэн сар амьдарч байгаад малыг нь хувааж аваад салдаг луйвар бий болсон гэхэд хилсдэхгүй болжээ.