Сонирхогчдын боксын насанд хүрэгчдийн эмэгтэйчүүдийн Дэлхийн аварга шалгаруулах тэмцээн гуравдугаар сарын 15-26-нд Энэтхэгийн нийслэл Шинэ Делигийн “Jadhav Indoor Hall” спорт цогцолборт үргэлжилж байна.
Монгол улсаас найман тамирчин оролцож, 54 кг-д М.Энхжаргал хүрэл медаль хүртсэн билээ. Мөн 45-48 килограммын жинд ОУХМ Л.Алтанцэцэг мөнгөн медалийн төлөө Марокко улсын тамирчин Моуттаки Ясминтай тулалдаж 5:0 харьцаатайгаар ялалт байгуулсан.
Тэгвэл өнөөдөр аваргын алтан медалийн төлөөх финалын тулаанууд 20:30 цагт эхэлнэ. Хамгийн түрүүнд 48 кг-ын жингийн Л.Алтанцэцэг рингэнд гарах юм. ДАШТ-ий мөнгөн медальтай түүнд өнөөдөр дэлхийн аварга болох боломж бий.
Түүний өрсөлдөгч нь Энэтхэгийн Ниту Гангас. Тэрээр 22 настай залуу тамирчин ч 2017, 2018 оны залуучуудын дэлхийн хошой аварга, 2022 оны Commonwealth Games наадмын аварга. Энэ наадмын дараа гэмтэл бэртлээс хэсэг хугацаанд завсарлаад эргэн ирж байгаа тамирчин аж. Гангас ДАШТ-ий хагас шигшээд 2022 оны ДАШТ-ий мөнгөн медальт, 2022 оны Азийн аварга, 2014 оны өсвөрийн олимпын хүрэл медальт, Казахстаны Алуа Балкибековаг ялж финалд шалгарсан тамирчин юм.