Хилийн боомтуудаар ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч буй хүндрэлийг хянан шалгах үүрэг бүхий УИХ-аас байгуулагдсан Түр хорооноос ирэх сарын 10-наас 12-ны өдрүүдэд "Нүүрсний хэрэг"-ээр нээлттэй сонсгол зохион байгуулахаар бэлтгэл ажлаа хангаж байна. Хянан, шалгах түр хорооны дарга Г.Ганболдын мэдээлснээр, тус сонсгол "Хөгжлийн банкны асуудлаарх нээлттэй сонсгол"-той харьцуулахад агуулга, хэлбэрийн хувьд өөр тул товлосон хугацаанд зохион байгуулах бүрэн бололцоотой аж.
Нээлттэй сонсгол”-ыг гурван өдөр зохион байгуулж, 80 гаруй хүнийг гэрчээр дуудаж, тайлбар авах юм байна.
Гэрчүүдийн жагсаалтад ҮАБЗ-ийн нарийн бичгийн даргаар ажиллаж байсан хүмүүс болон одоо ажиллаж буй хүмүүс, тухайн үед салбар хариуцаж байсан сайд нар, төрийн өмчит компаниудын ТУЗ-ийн дарга, "Эрдэнэс Тавантолгой" ХК-ийн захирал асан Б.Ганхуяг, "Тавантолгой төмөр зам" ХХК-ийн гүйцэтгэх захирал асан Н.Удаанжаргал нар бий. Үүнээс гадна гаалийн байгууллагын үе үеийн удирдлагууд, шийдвэр гаргах түвшинд оролцсон, гэрээ хийхэд гарын үсэг зурсан хүмүүс багтжээ. “Нээлттэй сонсгол”-ын эхний өдөр нийгмийн анхаарлыг татаад буй оффтейк гэрээ, түүнээс шалтгаалан улс орон, нийтийн эрх ашиг хохирсон эсэх асуудлыг хэлэлцэх юм байна. Сонсголын хоёр дахь өдөр ямар хэмжээний нүүрс  хил, гаалиар алдагдсаныг нотлох баримт, шинжээч, хянан шалгагчдын цуглуулсан материалд тулгуурлан хэлэлцүүлэх аж.