Дэлхийгээр тойрон аялагч  Ж.Золбаяр сэтгэцэд нөлөөт бодис хэрэглэж байгаад баригджээ. Уг хэргийг цагдаагийн байгууллагаас илрүүлэн шалгалтын ажиллагааг үргэлжлүүлж байгаа аж. Монголчууд түүнийг аялагч Амай гэдгээр нь сайн таньдаг билээ.

Тодруулбал, энэ оны гуравдугаар сарын 24-ний өдөр цагдаагийн байгууллагад “Чингэлтэй дүүргийн нисдэг машины урд байрлах байранд иргэн З нь хар тамхи хэрэглээд байна” гэх дуудлага, мэдээлэл бүртгэгдсэн байна. Энэ дагуу цагдаагийн байгууллагаас шалгалтын ажиллагаа явуулахад Чингэлтэй дүүргийн 5 дугаар хороонд оршин суух хаягтай иргэн З нь сэтгэцэд нөлөөт бодис болох өвс /мариухан/-ийг хууль бусаар олж авсан, хадгалсан байсныг илрүүлжээ. Мөн тухайн иргэний биологийн дээжэд тавьсан сорилоор дээрх мансууруулах төрлийн бодисыг хэрэглэсэн нь урьдчилсан байдлаар тогтоогдсон тул нарийвчилсан шинжилгээ хийлгэхээр шинжээч томилуулан холбогдох мөрдөн шалгах ажиллагааг явуулж байгаа юм байна.