Монголын Эмнести Интернэшнл байгууллагаас "Дэлхийн хүний эрхийн төлөв байдал, Монгол дахь тусгал" хэлэлцүүлгийг өнөөдөр зохион байгууллаа. 
Хэлэлцүүлгийн үеэр Хүний Эрхийн Үндэсний Комиссын гишүүн Г.Нарантуяа "Хүний эрхийн үндэсний комиссоос Монгол Улс дахь хүний эрх, эрх чөлөөний төлөв байдлын 22 дахь илтгэлийг УИХ-д хүргүүлэхэд бэлэн болж байна. Хүний эрхийн асуудал өргөн хүрээтэй, олон талтай. Бүх эрх, эрх чөлөөний асуудлаар өсөлт, бууралт ярьж болно. Эдийн засаг, нийгэм, соёлын эрх чөлөөний төлөв байдал төдийлөн сайн биш байна.
Дэлхийд улс төрийн эрх чөлөөний нөхцөл байдлыг үнэлдэг олон индекс бий. Бүх индекс нэг дүнг харуулж байгаа нь эрх чөлөөт ардчилсан орон зай хумигдаж байна. Дэлхийн хүн амын 10 хүн тутмын нэг нь эрх чөлөөт орон зайд амьдарч байгаа юм. Манай улсын иргэдийн хувьд том зургаараа үзэл бодлоо илэрхийлэх эрх чөлөөтэй орон зайд амьдарч байна. Гэхдээ энэ нь тайван хуран чуулах, үзэл бодлоо илэрхийлэх, хэвлэн нийтлэх эрх чөлөөнд асуудал байхгүй гэсэн үг биш.
Ялангуяа шүүмжлэлтэй дуу хоолой илэрхийлж буй үйл явцыг намжаахад чиглэсэн төрөл бүрийн шууд болон шууд бус арга хэмжээ байна гэж ХЭҮК дүгнэсэн. Бид нөхцөл байдлыг дүгнэхийн хамт эрх зүйн шийдлийг нь санал болгож байгаа. Жагсаал цуглаан хийх журмын, Хэвлэлийн эрх чөлөөний тухай хууль, Төрийн бус байгууллагын эрх зүйн зохицуулалтыг хийхдээ ямар нүдээр харж, ямар асуудлыг тусгаж, ямар чиглэлээр бичих нь ардчилсан эрх чөлөөт Монгол Улсад чухал юм бэ гэдэг асуултад хариулт өгөхийг зорьж, хүний эрх чөлөөний төлөв байдлын илтгэлд иргэний оролцооны эрх зүйн зохицуулалт гэдэг бүлгийг оруулсан" гэдгийг хэллээ.