Орос, Украийы дайн эхэлснээс хойш Ши Жиньпин дарга Зеленскийтэй нэг ч удаа холбогдоогүй. Тэгвэл Украйны ерөнхийлөгч Зеленский "Associated Press" агентлагт ярилцлага өгөх үеэрээ Хятадын дарга Ши Жиньпинийг Киевт айлчлахыг урьж, "Бид түүнийг хүлээж авахад бэлэн байна" хэмээн ярьжээ. Зеленский Сумы мужаас Киев рүү явах замдаа галт тэрэг дотор ярилцлага өгчээ. "Associated Press" агентлаг нь дайн эхэлснээс хойш Зеленскийтэй хамт олон удаа аялсан хэвлэл мэдээллийн байгууллага юм.

Ши Жиньпин, Путин нарын өнгөрсөн сард хийсэн Москва дахь уулзалтын үеэр Украины хямралыг зохицуулах 12 зүйлт төлөвлөгөөг танилцуулсан. Тэгвэл уг төлөвлөгөөг танилцуулсан боловч дайныг зогсоох тухай тодорхой шийдэлд хүрээгүй байсан. Хятадын талаас танилцуулсан төлөвлөгөөг АНУ сайшаагаагүй. Гал зогсоох нь Оросын армид хугацаа хожих боломж олгоно гэж тэд үзсэн байна. Харин ерөнхийлөгч Зеленский Хятадын дипломат оролцоог сайшаасан ч орос цэргүүд Украины нутаг дэвсгэрээс гарсан цагт л энх тайвныг тогтоох асуудлыг авч үзнэ гэжээ.