БОАЖЯ-ны ажлын хэсэг Дорнод аймгийн Матад суман дахь "Петрочайна дачин Тамсаг" ХХК-ийн 19 дүгээр талбайд 2022 оны долдугаар сарын 4-8-ны өдрүүдэд ажилласан байна.

Тус хугацаанд "Петрочайна дачин Тамсаг" ХХК 32 нэр төрлийн 592 тонн орчим устгах шаардлагатай химийн бодис хадгалж байсныг устгуулахаар болжээ. 

Эдгээр химийн бодисуудыг тус компани 2009 оноос өмнө импортоор оруулж ирсэн аж. Хадгалалтын буруутай үйл ажиллагаанаас шалтгаалан ашиглалтын шаардлага хангахгүй аюултай хог хаягдал болж хувирчээ.

“Петрочайна Дачин Тамсаг” ХХК нь "Элемент" ХХК-тай гэрээ байгуулан ажиллаж, 2022 оны арваннэгдүгээр сараас эхлэн "Элемент" ХХК нь химийн бодисын хог хаягдлыг график төлөвлөгөө гарган устгаж эхэлсэн байна. 2023 оны гуравдугаар сарын 28-ны өдрийн байдлаар нийт 32 нэр төрлийн 577 тонн аюултай хог хаягдлыг устгалд оруулаад байгаа мэдээллийг тус яаманд ирүүлжээ.

БОАЖЯ-ны Хүрээлэн буй орчны бодлого зохицуулалтын газрын дарга Б.Буяннэмэх: "Төв аймгийн Сэргэлэн сумын нутагт аюултай хог хаягдлыг устгах, дахин боловсруулах үйлдвэрийг 20 га газарт барьж байгуулахаар ажиллаж байна".