"Барселона"-ийн санаа Мессид, Мессигийн санаа Европт байна.

Лео Мессигийн “ПСЖ”-тэй байгуулсан гэрээ ирэх зургаадугаар сард дуусна. Парисын клуб Аргентин довтлогчтой шинэ гэрээ байгуулах эсэх хэлэлцээр зогсонги байдалд ороод байна.

Тэгвэл Арабын “Аль-Хилаль” клуб Лео Мессид жилийн 400 гаруй сая еврогийн гэрээ санал болгожээ. Тодруулбал, уг санал нь Саудын Арабын хөлбөмбөгийн рекордыг тогтоох боломжтой аж.

Лионель Месси Арабын уг саналаас татгалзсан гэж “TyC Sport”-ын сэтгүүлч Гарсия Грова мэдээллээ. Лео карьераа Европт үргэлжлүүлэх хүсэлтэй байгаа аж.

“ПСЖ” клуб Мессид цалинг нь бууруулсан гэрээ санал болгож байгаа бол “Барселона” клуб түүнийг эргэн ирэхийг хүлээж байна.

“Барселона” клубын хувьд Мессид Роберт Левандовскитэй тэнцэх хэмжээний цалинтай 2025 он хүртэлх гэрээ санал болгохоор төлөвлөж байна. Хамгийн сүүлийн мэдээллээр  Роберт Левандовски сард татвараас өмнө 2.17 сая евро авдаг аж. Түүнчлэн клубын ивээн тэтгэгчийн орлогын тодорхой хувь санал болгох юм.