Олон улсын жүдо бөхийн холбоо (IJF)-ны календарьт багтдаг өсвөр үеийн Азийн цомын тэмцээн өнөөдөр Казахстаны Алматы хотод эхэлсэн.

Манай улсааc тус тэмцээнд 20 гаруй өсвөр үеийн жүдоч эх орноо төлөөлөн оролцож буй бөгөөд эхний өдөр манай улсын гурван тамирчин охин иж бүрэн медалийн цуглуулгатай боллоо.

Тодруулбал, 48 кг-ын жинд "Женко" клубийн тамирчин Жамсрангийн Анударь алт, 52 кг-д "Гүрү дожо" клубийн тамирчин Тэрбишийн Ариунзаяа мөнгө, 44 кг-д "Женко" клубийн тамирчин Энхтөрийн Тэмүгэн хүрэл медалиар энгэрээ мялаав.

Өнгөрсөн жилийн өсвөр үеийн Азийн аварга Ж.Анударь Алматыд аваргалахдаа Казахстаны Ренато Жумабаева, Узбекистаны Сабина Азаматова, Казахстаны Кера Хегай, Узбекистаны Зарина Жамалова нарыг тус тус ялж, Монгол Улсын алтан соёмбот далбаагаа мандууллаа.