Зарим аймгийн нутгаар салхи минутад 24 метр хүртэл ширүүсч, цасан болон шороон шуурга шуурахыг Цаг уур орчны шинжилгээний газраас анхааруулсан. Тодруулбал, Дундговь, Говьсүмбэр, Дорнод, Сүхбаатарын нутаг, Хэнтийн өмнөд, Дорноговийн хойд хэсэг болон Өмнөговийн зүүн хэсгээр өнөөдөр /2023.04.10/ цаг агаарын аюултай үзэгдэл болж буй.

Авто тээврийн үндэсний төвөөс тодруулахад “Орон нутгийн замд үзэгдэх орчин хязгаарлагдах эрсдэлтэй байна. Одоогоор аймгууд руу зорчих замыг хаагаагүй ч шаардлагатай болбол хөдөлгөөнийг хязгаарлах зохицуулалт хийнэ” гэлээ.

Авто замын зорчих хэсэгт цасан давхарга үүсэх, шөнөдөө мөстөж халтиргаа гулгаа нэмэгдэх тул орон нутагт зорчиж буй иргэд, жолооч нар тээврийн хэрэгслийн техникийн бүрэн байдлаа хангах, өвлийн дугуй тавих, замын нөхцөл байдалд тохирсон хурдаар зорчихийг онцгойлон анхаарууллаа.

Мөн цаг агаарын аюултай үзэгдэл болох эрсдэлтэй тул аль болох хол замд зорчихгүй байхыг зөвлөлөө.

Одоогоор замын хөдөлгөөнийг хязгаарласан аймаг, сум байхгүй. Гэхдээ цаг агаарын байдлыг харгалзаж түр хугацаанд зам хааж болзошгүй байна. Тиймээс Онцгой байдал болон Тээврийн цагдаагийн алба, АТҮТ-ийнхөн аймгуудын пост дээр ажиллаж байгаа аж. Иймд онцын шаардлагагүй бол орон нутгийн замд хөдөлгөөнд оролцохгүй байх, тээврийн хэрэгслийн бүрэн бүтэн байдлыг хангахыг албаныхан анхааруулж байна.