Төрийн хишиг юм даа. Ингэж хэлэх хүн олон ч яг үнэндээ бол нэрэндээ томдсон өчүүхэн хаялга  юм. 
0-3 хүртэлх насны хүүхдээ асарсны тэтгэмж буюу Цалинтай ээж хөтөлбөрийг 2018 оноос хэрэгжүүлж,  сард бүр 50 мянган төгрөгийн эхэд олгодог. Зарим хүн чамлахаар чанга атга гэх байх. Гэвч эх, нярайн хэрэглээ хэрэгцээ үүнээс хэд зуун дахин их. Эхчүүд төрийн цалингаараа нэг уут памперс ч авч хүрэлцдэггүй. Гэтэл БНСУ-д гэхэд л өнөөдөр төрсөн эх, нярайд хүүхдийг нь гурван нас хүртэл нь төрөөс сар бүр монгол төгрөгөөр 1,8 сая төгрөгийн тэтгэмж олгож, хүн амынхаа бодлогыг дэмжиж байна. Харин Монголд таваг шөлний мөнгийг “Цалинтай ээж” гэх том нэрийн дор нүүр улайхгүйгээр өгч байна, энэ төр, засаг.
Үүний нэгэн адил ахмадуудад олгодог “Насны хишиг”-ийг бас дурдаж болно.  Ахмадаа хүндэлнэ, дээдэлнэ гэх хоосон уриа лоозонтой төр жилд хоёр удаа настнууддаа Цагаан сар, Үндэсний их баяр наадмаар хишгээ олгодог. Тодруулбал,
-65-69 настай  ахмад настанд 50 мянга 
-70-79 настай  ахмад настанд 80 мянга 
-80-89 настай  ахмад настанд 150 мянга 
-90 ба түүнээс дээш настай ахмад настанд 250 мянган төгрөгийн хишиг хүртэээдэг билээ. 
Гэвч энэ хишгийг хүртэх нь хэд билээ. Сар биш жилд хоёрхон удаа олгох Насны хишиг мөн л чамлалттай. Төрийн идээч, уугаачид өчнөөн их наяд, тэрбумаар  нь ханаж цадахгүй идэж байхад насаараа нийгмийн  даатгал төлж, төсөв бүрдүүлж ирсэн ахмадууд маань жилд хоёрхон удаа л 50 мянган төгрөгийг Төрийн хишиг хэмээн сүсэглэн авч байна. Ахмад настан, балчир үрсдээ ийн татанга төр, засагтай билээ, бид.