Хятад дахь судалгааны баг "Ковид-19"-ийн дэгдэлттэй холбоотой гурван жил гаруйн өмнө авсан дээжийн шинжилгээний хариуг нийтэлжээ.

Хуанань далайн хоол, зэрлэг ан амьтдын зах нь коронавирусийн гарал үүслийг хайх гол цэг болсон билээ. Энэ нь 2020 онд захаас цуглуулсан дээжийг судалсан анхны судалгаа юм. Судалгааны үр дүнд вирус эерэг гарсан арчдас нь зэрлэг амьтдын удамшлын материал агуулсан болохыг тогтоожээ. Зарим эрдэмтэн энэ өвчнөөр анх өвчилсөн амьтнаас хүнд дамжсаны бас нэгэн нотолгоо гэж үзэж байна.

Дэлхийн улс орнууд БНХАУ-ыг шинжилгээний хариуг гурван жилийн дараа ил болгож байгааг шүүмжилж байв. Хятадын судалгааны баг өнгөрсөн хоёрдугаар сард судалгааныхаа эхний хувилбарыг онлайнаар нийтэлсэн боловч дээжинд агуулагдах генетикийн мэдээллийг бүрэн нийтлээгүй байна. Олон улсын өөр бүлэг судлаачид удамшлын дарааллыг шинжлэх ухааны мэдээлэл солилцох вэб сайтад нийтэлсэний дараа шинжилгээний хариуг үндэслэн хэд хэдэн таамаг дэвшүүлжээ.

Глазгогийн их сургуулийн профессор Дэвид Робертсон нь SARS-CoV-2 2020 онд гарснаас хойш генетикийн судалгаанд оролцсон вирус судлаач юм. Тэрбээр “BBC News”-т өгсөн ярилцлагадаа "Хамгийн чухал нь энэ шинжилгээний мэдээллийн багц хэвлэгдсэн нь бусад хүмүүст шинжилгээний хариун дээр тулгуурлаж судалгаа хийх боломж олгож байна. Энэ нотлох баримтууд чухал" гэжээ.

Эх сурвалж: BBC