Дэлхийн улс орон коронавирусийн халдварын тохиолдлоор тэргүүлж байгаа БНХАУ-ын иргэдийн нутагтаа нэвтрүүлэхийг зарим нь хориглож, зарим нь тодорхой хязгаарлалт, шаардлага тавиад байгаа. Манай улсын хил, боомт ч нээлттэй байгаа. Гэвч цар тахлын халдвар хятад иргэдээр дамжин орж ирэх магадлал асар өндөр байна. Тухайлбал, БНСУ-ын Өвчний хяналт, урьдчилан сэргийлэх агентлаг тус улсын нисэх онгоцны буудалд буусан 327 хятад иргэний 103-аас нь коронавирус илэрсэн талаар мэдээллээ.
БНСУ-ын нисэх онгоцны буудалд коронавирус илрүүлэх PCR шинжилгээг авч байгаа бөгөөд эерэг гарсан бол тусгайлан бэлдсэн байранд аваачиж, долоо хоног хүртэлх хугацаагаар тусгаарлаж байгаа юм. 
БНХАУ-аас ирж буй иргэдээс коронавирусийн тохиолдол олноор илэрч байгаа тул БНСУ-ын эрх баригчид өнөөдрөөс буюу нэгдүгээр сарын 7-ноос Хонгконг, Макаогийн жуулчдад хятад иргэдтэй адил хатуу шаардлага тавихаа мэдэгдлээ.