Монгол Улсад Камила Валиева тэргүүтэй ОХУ-ын зэрэглэл өндөртэй уран гулгагчдын хамтарсан шоу тоглолт "Мөсөн Өргөө"-д зохион байгуулагдахаар болжээ. 

Энэ талаар "Мөсөн Өргөө"-ний Бизнес хөгжил, маркетингийн албаны дарга Э.Билэгсэдээс тодрууллаа. 

Тэрбээр "Камила Валиева тэргүүтэй ОХУ-ын шилдэг 16 уран гулгагчтай хамтарсан шоу тоглолт тавдугаар сарын 6-7-нд зохион байгуулахаар болсон. Эрэгтэй, эмэгтэй ганцаарчилсан тус бүр дөрөв, бүжгийн хос нэг, хосын үзүүлбэр гурав гэсэн нийт 16 тамирчин ирнэ.

Уг шоу тоглолт хоёр өдрийн турш "Мөсөн Өргөө"-д болох хуваарьтай байна. Монголын тамирчин О.Мишээл нээлтийн үзүүлбэр үзүүлнэ" хэмээв.

Нийт 16 тамирчин тус тоглолтод оролцох ба 12 бүрэн хэмжээний уран гулгалтын үзүүлбэр тоглогдох юм.

Камила Валиева, Елизавета Туктамышева, Евгений Семененко, Дмитрий Алиев гэх мэт од болон гялалзаж буй, дэлхий дахинд өөрсдийгөө харуулж чадсан шилдэг уран гулгагчид ирэх нь тодорхой болжээ. Тун удахгүй бусад бүх тамирчдыг зарлах гэнэ.