АНУ-ын Кентаки мужийн нэгэн банкны ажилтан ажлын байран дээрээ гал нээж, үүнийгээ инстаграмаараа шууд дамжуулжээ. Уг халдлагын улмаас 40-64 насны таван хүн амиа алджээ.

Есөн хүн бэртэж гэмтсэний нэг нь ердөө 14 хоногийн өмнө сургуулиа төгссөн шинэхэн цагдаа байжээ. Тус цагдаа толгойдоо буудуулсан учир биеийн байдал хүнд, мэс засалд орохоор байна. Цагдаа нар гурван минутын дотор хариу арга хэмжээ авч, халдага үйлдэгч этгээдийг бууджээ.

Уг халдлагыг зорилготой үйлдэл байсан гэж үзэж байна. Халдлага үйлдэгч этгээд нь гурван жилийн турш "Old National Bank"-д дадлагжигч хийсний эцэст өнгөрсөн жил үндсэн ажилтан болжээ. Мөн тухайн этгээд өмнө нь ямар нэг гэмт хэрэгт орооцолдож байгаагүй. Гэхдээ банкны удирдлагууд түүнийг ажлаасаа гар гэж шахаж шаардсан байна. Тиймээс галт зэвсгийн халдлага үйлдэх тухайгаа Даваа гаригт ажилдаа явахаасаа өмнө бичиж үлдээжээ.

Инстаграм дээрх бичлэгийг Мета компани тэр дор нь устгажээ.

Дашрамд дурдахад, АНУ-ын 26 мужид 21 нас хүрсэн бол лицензгүйгээр буу худалдаж авах боломжтой байдаг бөгөөд Кентаки нь тус 26 мужид багтдаг.

Эх сурвалж: BBC