Монгол Улсын Төсвийн тухай хууль 2022 оны арваннэгдүгээр сарын 11-нд батлагдсан.

Уг хуулинд тэтгэвэр авч байгаа хүнийг төсвөөс цалинжуулахгүй байх хуулийн заалтыг тусгасан юм. Харин "Өнөөдрийн байдлаар 6,161 хүн тэтгэвэр авч байгаа хэр нь төсвөөс цалинжиж байна. Мөн төрийн тусгай албан хаагч 156 хүн цэргийн насны тэтгэвэр тогтоолгосон ч цалингаа авч байгаа юм. 

6,161 хүнийг өнөөдрийг хүртэл төсвөөс цалинжуулсан нь 7.5 орчим тэрбум төгрөг. Үүнийг бүтэн жилээр тооцвол нийт дүнгээр 30 тэрбум төгрөг болохоор байгаа" хэмээн Шүүр ажиллагааг хариуцаж буй Засгийн Газрын Хэрэг Эрхлэх Газрын дарга Д.Амарбаясгалан мэдээлэв. 

Мөн цэргийн насны тэтгэвэр тогтоолгосон 156 хүний цалин 250 орчим сая төгрөг зарцуулсан байгааг бүтэн жилээр нь үзвэл нэг тэрбум болохоор байгаа аж.

Иймд тэтгэврийн насны хүмүүсийг төсвөөс цалин авч байгааг таслан зогсоовол 31 орчим тэрбум төгрөг хэмнэж, шинэ ажлын байр бий болгож, залуус, мэргэжилтэй боловсон хүчин ажиллах нөхцөлийг бүрдүүлэх боломжтой гэж үзэж байгааг тэрбээр мөн хэллээ. 

ЗГХЭГ-ын дарга Д.Амарбаясгалан "6,161 хүнийг бүгдийг нь хууль зөрчсөн гэхэд хэцүү бөгөөд аймаг, сумын түвшинд, Улаанбаатар хотын захын хороодод мэргэжлийн боловсон хүчин олдохгүйн улмаас тэтгэвэрт гарсан хүмүүсийг урьж ажиллуулах тохиолдол байна. Үүнийг дүгнэж үзээд, мэргэжлийн боловсон хүчнийг ажиллуулж, төсвийн хуулиа ягштал биелүүлэхийн төлөө арга хэмжээ авна" гэв.

Мөн Шүүр ажиллагааны хүрээнд төрийн хэдэн албан хаагч ажлаасаа чөлөөлөгдөх талаар тодруулсан сэтгүүлчийн асуултад "Гаалийн Ерөнхий Газраас 150-160 хүн ажлаас чөлөөлөгдөх мэдэгдлээ авсан байна.

Чөлөөлөгдөж буй үндэслэл нь 

• 60 нь төрийн албаны ерөнхий шалгалт өгөөгүй байна. 
• Засгийн газраас батлагдсан бүтэц орон тооноос хэтрүүлэн томилогдсон
• Авлига, албан тушаалын гэмт хэрэгт холбогдож байсан цөөн хүн 
• Тэтгэврийн насанд хүрээд тэтгэврээ аваад цалинжиж байгаа цөөн хүн чөлөөлөгдөж байгаа" хэмээв.